WASIO NA AJIRA RASMI WATAKIWA KUJIUNGA NA PSPF ILI KUNUFAIKA NA MAFAO YA ELIMU, KUJITOA, UJASILIAMALI NA FAIDA KIBAO

 

Kushoto ni afisa wa PSPF akiwa kwenye banda lao leo katika uwanja wa Sokoine Jijini Mbeya katika siku kuu ya wafanyakazi duniani.

  Wa pili kutoka kulia ni afisa wa PSPF Side Kipindula

akiwa katika mahojiano na Blog ya www.kalulunga.com 

Na, Gordon Kalulunga, Mbeya

WANANCHI waliojiajiri wakiwemo Mama Ntilie, Machinga na wengine wenye vipato vidogo na vikubwa ambao hawako kwenye sekta rasmi za ajira, wametakiwa kujiunga na mfuko wa pensheni wa watumishi wa umma kwa kuchangia kwa hiari.

Akizungumza na mtandao wa www.rizikimgaya.com Afisa mfawidhi wa PSPF mkoa wa Mbeya Side Kipindula, amesema kuwa mfuko huo umeanzisha utaratibu wa kuwakomboa wananchi hasa ambao hawako kwenye mfumo rasmi wa ajira.

‘’Baada ya kujikita kwa wafanyakazi walio kwenye ajira rasmi, sasa mfuko umeona ni jambo jema kwenda pia kwa wananchi ambao hawapo kwenye mfumo rasmi wa ajira kwa kuwapa mafao wale wanaohamasika kujiunga’’ alisema Kipindula.

Alisema kwamba, mwananchi ambaye anataka kujiunga na mfuko huo kupitia uchangiaji wa hiari anatakiwa kila mwezi kuchangia Shilingi 10,000/= ama zaidi na hata anapokwama hashurutishwi kuchangia.

Amezitaja faida za kuchangia mfuko huo kwa hiari ambazo ni kupata mafao ya elimu, mafao ya mwanachama anayeamua kujitoa, ujasiliamali nk.

‘’Faida za mwanachama anayejiunga nasi katika mfumo wa uchangiaji wa hiari ni kubwa ikiwemo kukopa fedha baada ya kuchangia kwa miezi 12 ambapo mwanachama anayechangia fedha kubwa kila mwezi anaweza kukopa muda wowote’’ alisema afisa huyo.

Aliitaja faida nyingine kubwa kuwa ni pamoja na kila mwanachama kuwekewa fedha za faida kutokana na gawio la faida ya mfuko huo kulingana na kiasi alichoweka kwenye mfuko wa PSPF kila mwezi.

Fedha hizo huwekwa kwenye kila akaunti ya mwanachama mwezi Januari na mwezi Juni.

Anatoa wito kwa wananchi kujitokeza kwa wingi kujiunga na mfuko huo hasa kupitia mfumo wa uchangiaji wa hiari ambao alisema kuwa anaamini wananchi wengi wapo katika ajira zisizo rasmi.

Kwa upande wa wanachama ambao wapo kwenye ajra rasmi, alisema shirika hilo limeanzisha mpango wa kujenga nyumba na kuwakopesha.

Sifa za mwanachama anayeweza kukopa hizo nyumba za kuishi ni yule aliyechangia kwa miaka mitano na kuendelea.

‘’Kwa mkoa wa Mbeya tupo katika harakati za kutafuta viwanja na pindi tutakapopata tutaanza kupokea maombi ya wanaohitaji kukopa nyumba hizo, lakini kwa wale waliokaribia kustaafu na kubakiza miaka mitano kazini  tunawapa fedha taslimu nusu ya kiinua mgongo chao’’ alisema Side Kipindula.