WAINGEZA NA WAKELWA NA MUUNGANO

Licha ya kupita miaka 40 tangu Uingereza ijiunge na Muungano wa Ulaya (wakati huo jina lilikuwa Jumuiya ya Uchumi ya Ulaya), bado mabishano yangaliko miongoni mwa raia wa visiwa hivyo,  kuhusu kero ndani ya Muungano huo, na kama ni bora hivi sasa nchi hiyo ijitoe.

Hali hiyo imezifanya nchi nyingine shirika ndani ya Muungano huo kulalamika kwamba Uingereza ni korofi, inazuia mwenendo wa kuzidi kuiunganisha Ulaya itakayokuwa imara zaidi na huenda siku moja ikawa na Serikali moja.

Januari mwaka huu Waziri Mkuu wa Uingereza, David Cameron alitangaza kwamba huenda, baada ya uchaguzi mkuu ujao wa mwaka 2015, iwapo atashinda, huenda Waingereza wakatakiwa kupiga kura ya maoni mwaka 2017 kama wanataka nchi yao ibakie ndani ya Muungano wa Ulaya.

Hata hivyo, bado kuna wabunge kutoka chama chake cha Conservative walioonesha hawajatosheka tu na ahadi hiyo ya kiongozi wao –Walitaka zaidi, na kumbinya aweke wazi kupitia sheria kwamba kura hiyo ya maoni hakika itafanyika, na isitegmee chama chake kushinda uchaguzi ujao au yeye kubakia madarakani hadi wakati huo.

Pia wala isitegemee matokeo ya mashauriano ambayo Uingereza inataka yafanyike ili ijipatie masharti mapya yaliyo bora kubakia katika Muungano huo.

Wiki iliyopita wabunge 130, wengi wao wakiwa kutoka Chama cha Conservative ambao wanakerwa na mfumo wa Muungano wa Ulaya na namna nchi yao inavyotendwa, waliwasilisha bungeni muswada uliolaumu msimamo wa Serikali yao kuelekea Muungano huo.

Ilikuwa kama kumpiga kibao cha usoni Cameron. Mswada huo ulishindwa kupita bungeni, lakini ulitoa ishara muhimu ya kisiasa.

Ni wazi kwamba hisia za Waingereza wengi kupinga nchi yao kubakia ndani ya Muungano wa Ulaya  zinazidi, japokuwa wachache kati yao ni kutokana na uzalendo kuliko kuangalia hali halisi ya mambo.

Mada juu ya werevu wa kuitisha kura ya maoni inabakia katika vichwa vya habari, na hata katika chaguzi za karibuni za Serikali za Mitaa chama cha Ukip, kinachotaka Uingereza itoke kutoka Muungano wa Ulaya, kilifanikiwa kupata kura nyingi za kutoka wanachama wa chama tawala cha Conservative.

Chama hicho cha Ukip katika uchaguzi ujao huenda kikaweza kukipotezea ushindi chama cha Conservative, na kuacha njia wazi kwa chama cha Labour kuingia madarakani. Wanachama wengi wa Chama cha Conservative hivi sasa wanataka viongozi wao watamke wazi na bayana kuhusu nchi yao kubakia ndani ya Muungano.

Kilichowaudhi wabunge hao waliowasilisha muswada wao ni kwamba katika hotuba ya karibuni aliyoitoa Malkia bungeni- ambayo ni programu ya Serikali kwa siku zijazo- hakujatajwa kwamba Serikali itawasilisha rasimu ya sheria bungeni kuhusu kuitishwa kura ya maoni.

Kwa hakika Cameron asingepinga Serikali yake kuwasilisha rasimu ya aina hiyo. Lakini ana tatizo. Nalo ni kwamba Serikali yake ni ya mseto ambapo ndani yake kuna chama cha Liberal Democratic kinachopinga au mara nyingine kutia na kutoa kuhusu suala la kuitishwa kura ya maoni.