SHITAMBALA SIGOMBEI UBUNGE

Dar es Salaam. Linapotajwa jina la Sambwee Shitambala, linaakisi sura nyingi za aina tofauti – Ni mwanajeshi, mwanasheria, mwanasiasa wa upinzani na dani ya chama tawala. Kuyaweza yote hayo ndani ya muda mfupi, ndiyo sababu ya safu hii kutaka kumfahamu, Endelea.

 

Aliyekuwa Mwenyekiti wa Chadema Mkoa wa Mbeya, Sambwe Shitambala akibebwa na Wana-CCM baada ya kujiunga na chama hicho mwaka jana. Picha na Maktaba 

Swali: Hongera kwa kuchaguliwa kuwa mjumbe wa Halmashauri Kuu ya Taifa ya Chama Cha Mapinduzi (NEC)

Jibu: Asante sana

Swali: Ulipata nafasi hii yenye ushindani CCM mara tu baada ya kujiengua Chadema, nini kilikusaidia kuipata?

Shitambala: Kweli, ushindani ni mkubwa na wagombea wengi ni wenye sifa na uwezo wa kila namna. Kilichonisaidia ni sera yangu binafsi ya kuendesha siasa nikilenga kuleta maendeleo kwa wananchi hata kama sijawa na uongozi wa kuchaguliwa.

Swali: Una mfano wowote unaoonesha uhalisia wa maelezo yako?

Shitambala: Ndiyo, kwa mfano sasa nimejikita kuleta maendeleo kwa vijana Mbeya mjini, kwa kuanzia nimewaunganisha wasiokuwa na ajira, wenye ajira zisizo rasmi na wakulima katika vikundi na kuwawezesha kimawazo na mitaji.

Kati ya Februari mwaka jana na sasa nimeunda vikundi vitano; Ibala Hope Center, Uyole Center, Nsalaga Center, Kabwe Center na Mabatini Center vyote vinahusisha vijana wa rika tofauti, vikilenga kuwajengea uwezo kifikra na kiuchumi ili wajiletee maendeleo.

Miongoni mwa shughuli zinazotekelezwa na vijana walio katika vikundi hivyo ni pamoja na, kushona nguo na kudarizi, ukulima na kutengeneza matofali yanayotumika katika ujenzi bila kutumia saruji.

Swali: Wewe ulikuwa mwanajeshi na mwanasheria, ilikuwaje ukaingia katika siasa?

Jibu: Baada ya kutoka jeshini mwaka 2006, nilianzisha ofisi yangu ya uwakili jijini Dar es Salaam. Absalom Kibanda alikuwa mmoja wa marafiki zangu wa karibu, hivyo nilikuwa nikimtembelea ofisini kwake, Tanzania Daima, ndipo nilipofahamiana na Freeman Mbowe (Mwenyekiti wa Chadema - taifa) ambaye alinishauri kuingia kwenye siasa na kupendekeza nikagombee kwenye uchaguzi mdogo wa ubunge Mbeya Vijijini, mwaka 2008.

Swali: Katika uchaguzi huo wewe mgombea wa Chadema ulienguliwa; nini kilitokea?