DC MAKETE: NI LAZIMA WANAFUNZI WOTE MAKETE WALE MASHULENI

  Na Edwin Moshi

Kutokana na kusuasua kwa huduma ya chakula kutolewa katika shule za msingi na sekondari wilayani Makete, kuanzia sasa suala hilo litakuwa la lazima na si hiari tena kama ilivyozoeleka miongoni mwa wazazi

Akizungumza na ripota wetu, Mkuu wa wilaya ya makete Bi. Josephine Matiro(PICHANI) ameagiza kuwa kuanzia sasa suala la wanafunzi kupata chakula shuleni kwao ni lazima hivyo wazazi na walezi wanatakiwa kuunga mkono agizo hilo kwa manufaa ya wanafunzi hao na taaluma kwa ujumla katika wilaya yake

Amesema wanafunzi kushinda mashuleni bila kula kunasababisha wao kuona kama wanateswa, na wengi wao wanashindwa kusoma vizuri kutokana na njaa na matokeo yake wanajikuta wakifeli siku hadi siku

“Tujiulize tu, kila mtu anajua njaa inavyouma, na wazazi/walezi wa makete hebu tubadilike na tuendane na wakati, kwa karne hii mwanafunzi kushinda na njaa shuleni hataweza kusoma na kufaulu, ifike wakati sasa tuchangie ili kila mwanafunzi wa shule yoyote wilayani hapa apate chakula shuleni” alisema

Ameagiza kuwa suala hilo linatakiwa litekelezwe kwa shule zote kuanzia muhula wa Julai mwaka huu, na ameahidi kulifuatilia suala hilo kuona kama linatekelezeka

Kufuatia agizo hilo mwandishi wetu alimfuata afisa elimu msingi wilaya ya Makete Bw. Antony Mpiluka kumuuliza kuhusu agizo hilo la mkuu wa wilaya na kusema ofisi yake imelipokea na italifanyia kazi huku akiomba ushirikiano kwa wazazi kuhakikisha wanachangia ili watoto wawe wanakula shuleni