KIKWETE TUTAICHUKIA CCM KWA SABABU WANANCHI NA SERIKALI HATUNA TAARIFA SAHIHI

 Rais Jakaya Kikwete

UBORA wa Taifa lolote lile hutegemea ubora wa mawazo ya watu wanaounda Taifa hilo pamoja na nidhamu ya watu wao.

Kwa kuwa mtu ni mawazo anayofikiri na jamii pia huundwa na mawazo basi kama jamii yetu sio bora tuangalie upya mawazo yetu sote si kwa kumrushia mpira fulani maana tunavyofikiri na kuishi ndivyo kizazi chetu pia kitaiga hivyo.

Tujenge familia zetu na jamii yetu katika fikra sahihi. Baadae yetu itategemea ubora wa fikra zetu na maamuzi yetu tutakayofanya kwa faida ya kesho.Taifa hili litafika mbali ikiwa tu tutabadili mwelekeo wa mawazo yetu.

Kuna misingi miwili kama si mitatu ya baadhi ya viongozi wa CCM itawatoa katika Chama Cha Mapinduzi.

Misingi hiyo ni pamoja na CCM ni chama cha kutetea wanyonge lakini siku ikiacha kutetea wanyonge, wengi wataondoka kwenye chama hicho madhubuti ambacho msingi wa kila mtu kuwa na haki ndani ya nchi hii kinautetea.

Umoja na mshikamano aliouacha Baba wa Taifa Mwalimu Julius Kambarage Nyerere.Siku chama hicho kikiacha kusimamia msingi huo wengi pia watajiengua na chama.

Misingi hiyo ikisimamiwa vizuri, hakuna mtu atakayekichukia Chama Cha Mapinduzi.

Kwasasa kuna tatizo ndani ya chama hicho ambalo ama kutofanya maamuzi kwa muda muafaka ama kufanya maamuzi ambayo siyo sahihi.

Ama kutochukua hatua katika matatizo yanayowakabili wananchi kwa wakati muafaka, jambo ambalo linasababisha kero na chuki kwa chama hiki ambacho ni chama imara.

Haya nimeyabaini baada ya kuwepo huko mjini Mbeya katika sikukuu ya Mei Mosi 2013, ambayo mgeni rasmi alikuwa ni Rais Jakaya Mrisho Kikwete.

Nilipokuwa huko mjini nilijifunza mengi ikiwemo kujua lugha za wanyama ambazo huko mjini zinathamani kubwa sana kuliko huku kwetu nyikani.

Niliposikia lugha hizo nikajisogeza na hatimaye kuuliza kuwa mbona huku mjini wanaoitwa wastaarabu wanazungumza lugha za ndege na wanyama?

Kwanza nikachekwa kisha wakaniambia kuwa lugha hiyo inaitwa Kiingereza.

Baada ya kuniambia hivyo kisha nami nikawajuza kuwa lugha hiyo kwetu tumezoea kuiita lugha ya ndege na wanyama maana ndege na wanyama ndiyo wanazungumza.

Walipojaribu kuwa makini kwangu nikawaambia kuwa huku kwetu Nyikni Ng’ombe utawasikia wakisema ‘’More more’’, Mbuzi utawasikia wakisema ‘’Men, Men’’ huku vifaranga vikisema ‘’New new new’’.

Hapo walicheka sana na kugundua kabisa kuwa mimi kweli nimetoka Nyikani.

Nianze kumpongeza sana Rais Jakaya Kikwete kwa kufanikiwa kusikia sauti za wasio sikika pale mjini Mbeya na hatimaye kuondoka na aliyekuwa Mkurugenzi wa Jiji la Mbeya Jumanne Idd.

Lakini wananchi wanahitaji kuona hatua za kisheria zinachukuliwa kwa muda muafaka dhidi ya Mkurugenzi huyo na wenzake hata kama amepata adhabu za kinidhamu vinginevyo wote wenye mamlaka, wataonekana wanahusika na tuhuma zake kupitia kale kamtindo ka-kulindana.

Rais Kikwete, nimerejea salama huku nyikani na sasa nipe muda kidogo wa kunisikiliza na hapa sikufundishi kazi wala jinsi ya kutimiza majukumu katika serikali yako ‘’sikivu’’.

Wiki ilyopita nilikueleza Rais Kikwete jinsi gani mimi ninavyoziona kura za udini mwaka 2015 hasa katika nafasi yako kutokana na wewe kusema kuwa hujui yanakotokea masuala haya.

Leo nikueleze kuwa Tanzania wakristo na waislam hatuna mgogoro wowote bali ni serikali yako kukwepa majukumu ya kuwashughulikia ipasavyo wahalifu. Parandesi hii inaumiza eeh! Niwie radhi.

Walioko magerezani asilimia 99 wote wana dini zao lakini hawakuhukumiwa kama makosa yao yalikuwa yametokana na dini zao, bali walihukumiwa kama wahalifu wa kawaida kwa mujibu wa sheria.

Genge hili linalotumia kivuli cha dini kufanya uhalifu hapa nchini lishughulikiwe kama kundi la wahalifu na wala hakuna haja ya kusingizia na kutaka kukaa na viongozi wa dini, tusikwpe majukumu ya kushughulikia wahalifu.

Hao viongozi wa dini unaotaka kukaa nao kila linapotokea jambo hawaujui huo unaoitwa mgogoro kwasababu hawajawahi kugombana na hakuna historia ya hicho serikali yako inachokiita mgogoro wa kidini.

Kwa kumalizia kuhusu udini nitoe wito kwa wananchi wenzangu kuwa kundi hili la wahalifu tuungane na serikali kuliteketeza maana ni kundi ambalo linawinda nchi zilizotulia kama Tanzania na kwa makusudi hawaendi kwenye nchi zenye vita. Hapo nimemaliza kuhusu udini.

Rais Kikwete, sikiliza tena sauti yangu kuhusu serikali yako na chama chako yaani Chama Cha Mapinduzi(CCM).

Niliwahi kusema siku za nyuma kuwa mwenye duka ni CCM na muuza duka ni watumishi wa serikali. Sijui kama ulinitegea sikio au ulikuwa na mambo mengi ya kushughulikia kuliko kusikiliza sauti yangu kutoka hapa nyikani.

Rais Kikwete, haya siyo mashairi. Ni ujumbe mzito kutoka huku nyikani kwa msaada wa wanyonge na hata nyie hapo juu wenye uahueni wa maisha.

Ukiisikiliza kwa makini sauti hii hasa leo, utagundua kinachowatesa huko serikalini na hata ndani ya chama unachokiongoza kama Mwenyekiti wake wa Taifa.

Wananchi wa Tanzania na bahati mbaya hata serikali, wote hamna taarifa sahihi ya kila upande mahitaji yake na hata kilichofanyika. Ndiyo maana mwenye duka anachukiwa yaani (CCM).

Serikali ina uhakika zaidi wa kupata taarifa kutoka kwa wananchi, lakini kwasababu mwajili wa watumishi wa serikali yaani CCM “madhubuti’’ wanawaogopa wauza duka wao, basi kila mtumishi anafanya ajualo na hakuna anayejali.

Watendaji wa chama hicho kwasababu wengi wamekikuta chama na wala hawajawahi kukihangaikia ndiyo maana wengi hawajali kwa kumaanisha.

Kinachofanyika ndani ya chama ni kupeana majukumu ya kukilinda chama nyakati za uchaguzi hasa kwa vijana.

Vijana wa CCM wanaonekana kila kona ya nchi kila siku nyakati za uchaguzi wakinadi sera na mambo kadha wa kadha hata wasiyoyajua.

Rais Kikwete ivumilie Sauti hii kutoka hapa nyikani, ni sauti ya unyonge sana ya mtu asiyeonekana lakini ni sauti yenye matumaini makubwa kwa wenye mamlaka mkiisikiliza na kuifanyia kazi.

Vijana wa CCM wanawezeshwa na kupewa ujasiri, lakini baada ya uchaguzi baadhi yao asilimia 80 wanakuwa hawajui kinachoendelea! Bila shaka unalijua hili lakini kimaandishi huko kwenye utendaji wanaonekna kana kwamba wanajua kinachoendelea.

Utekelezaji wa ilani ya uchaguzi, unaishia mikononi mwa wakurugenzi, copy zake ambazo ukweli wake unakuwa na mashaka pasipo  shaka wanapelekewa wakuu wa wilaya na wakuu wa mikoa hatimaye CCM husomewa ripoti hizo zenye mashaka makubwa, lakini nani anajali?.

Rais Kikwete, hayo yote ni matokeo ya kuwa na kundi kubwa la viongozi wasiojali na hapa natia shaka ubora wa mawazo yao kwa taifa letu ambapo kila taifa bora hutegemea mawazo bora ya watu wake.

Wananchi hawapati taarifa sahihi kutoka serikalini na serikali nayo haipati  na haina taarifa sahihi ya mahitaji sahihi ya wananchi wake “unaweza kupinga, ila pinga kwa hoja siyo malalamiko’’.

Rais Kikwete, najua baadhi ya watendaji wako wananipuuza na hawataki kuisikia sauti hii kutoka hapa nyikani lakini naamini wewe huwezi kunipuuza hata kidogo maana mimi ni mshauri wako wa mambo madogo madogo kwako lakini makubwa na muhimu kwa wananchi wanyonge na serikali yako.

Wananchi wana mahitaji yao lakini hakuna mtu wala kiongozi wa serikali anayewauliza matatizo hayo kama wewe unavyofanya kwenye ziara yako kuwa wananchi wakueleze matatizo yao.

Wabunge wengi hata bungeni wanajiwakilisha wenyewe na familia zao maana hata wakija kwenye ziara huku kwenye majimbo yao wanafanya kama mahubiri kisha ikifika saa kumi na mbili hufunga mikutano na kuondoka.

Rais Kikwete, unaweza kushangaa ukienda kwenye kijiji chochote hapa nchini na kuanza kuzungumza na wananchi. Utakachoambiwa na wananchi  hasa mahitaji yao hata madiwani na wabunge hawajui.

Jaribu kufanya hivyo na nitazidi kukusisitiza kuhusu ziara za kushitukiza katika mikoa mbalimbali ingawa uliwahi kusema kuwa kumtoa Rais Ikulu si jambo la kitoto.

Tatizo hapa ninaloliona ni kuahidi mambo mengi kwa wakati mmoja tena wakati wa furaha hali ambayo utekelezaji wake unakuwa mgumu.

Kinachotakiwa kufanyika kwa sasa ni kwamba, kwa kuwa mtu ni mawazo anayofikiri na jamii pia huundwa na mawazo basi kama jamii tufikirie baadae yetu kwa kuanza sasa kuwa na ubora wa fikra na maamuzi yetu kwa wakati.

Rais Jakaya Kikwete, kama kila mmoja atatimiza wajibu wake na tutawajibishana kutokana na mawazo yetu bora kwa nia ya taifa letu bora na wananchi wakapata taarifa sahihi na serikali nayo ikawa na taarifa sahihi ya mahitaji sahhi ya wananchi, hakika hakuna wa kuichukia CCM.