WENYE SIMU,MITANDAO YA KIJAMII KUKIONA

Wenye simu, mitandao ya kijamii kikaangoni

SERIKALI imesema itachukua hatua kali za kisheria kwa atakayebainika kutumia vibaya simu za mikononi, na mitandao ya kijamii kuleta uchochezi au kwenda kinyume cha maadili ya nchi.

Waziri wa Mawasiliano, Sayansi na Teknolojia, Profesa Makame Mbarawa aliwaambia waandishi wa habari mwishoni mwa wiki Dar es Salaam kuwa lengo la kufanya hivyo ni kukomesha vitendo hivyo kwani ni hatari kwa nchi.   ”Hatua hizo zitachukuliwa dhidi ya kampuni au mtu yoyote atakayetoa kashafa na kuitukana Serikali, viongozi wa Serikali, dini, siasa na watu binafsi,” alisema na kuongeza kuwa vitendo hivyo vinakiuka sheria za nchi.

Alisema hatua hizo zitawakumba pia watu wote wanaojihusisha na uoneshaji kwenye mitandao hiyo picha za ngono, unyanyasaji wa watoto na ukiukaji wa maadili na kutoa taarifa zenye lengo la kuvunja utulivu na amani.

”Matumizi mabaya ya Teknolojia ya Habari na Mawasiliano (Tehama), kama za simu za mikononi, barua pepe, na mitandao ya kijamii yanafanywa na watu wachache kwa kusambaza taarifa zenye nia ya kuchafua taifa letu,” alisema.

Alisema pamoja na kwamba teknolojia hiyo katika miaka ya karibuni imechangia kuleta maendeleo makubwa nchini, baadhi ya watu wanaitumia kwa mambo yasiyofaa.

Waziri alisema kuwa watu wengine wamekuwa wakiitumia kwa kufanya wizi, ujambazi, ubakaji, biashara ya dawa za kulevya na ukahaba na kusambaza siri za watu binafsi bila idhini ya wahusika.

Alisema matumizi yasiyofaa yanafanywa na watu wachache yanaelekea kuharibu maadili ya Watanzania na yanaweza kuhatarisha utulivu na usalama wa nchi kwa kutumia Tehama.   Prof. Mbarawa alisema pia kuwa hatua kali zitachukuliwa kwa wakala au kampuni ya simu yoyote itakayouza sim kadi kwa mtu yeyote bila ya kuwa na kitambulisho kinachotambulika kisheria.

Alisema pia ni kosa la jinai kutoa taarifa za uwongo wakati wa usajili wa sim kadi na Serikali imejipanga kuzima sim kadi zote ambazo hazijasajiliwa kama inavyotakiwa kisheria.

CHANZO;NIPASHE