JINSI SERIKALI YA RAIS KENYATTA ITAKAVYOKUWA

Submit Cancel

 

 

0
inShare

Mwanzo wa ngoma ni lele. Kenyatta tangu apokee cheti cha ushindi wa urais Machi 9 amekuwa katika harakati za kuunda Serikali yake mpya. Vyombo vya habari vimesheheni habari za kila aina; za ukweli na za uongo lakini kitu kimoja ni dhahiri: muundo wa Serikali utakuwa tofauti na wa Kibaki.

Hii ni kwa sababu Kenyatta angetaka kujisawiri kama kiongozi wa kisasa. Kiongozi chipukizi ambaye anaenda na wakati kwani mshuka ngazi na mpanda ngazi, hawashikani mikono.

Mbali na hayo, ameonyesha kwamba kamwe hana kinyongo na walioshindana naye katika kinyang’anyiro cha urais Machi 4 na amewanyoshea baadhi yao mkono wa amani akiwataka wajiunge naye katika ujenzi wa taifa.

Tayari amezungumza na kiongozi wa Muungano wa Amani, Musalia Mudavadi ambaye alizoa kura 400 elfu katika uchaguzi mkuu na kuwa nambari tatu baada ya Raila Odinga.

Kenyatta pia amefanya mazungumzo ya faragha na Eugene Wamalawa wa chama cha New Ford-Kenya akitaka ushirikiano naye. Kuna fununu kwamba anaweza kumpa cheo uwaziri Wamalwa kwa kuwa yeye ni mwanadani wake kisiasa na vilevile licha ya kuwa waziri wa Haki na Masuala ya Kikataba, alimtetea vikali kitaka kesi inayomkabili (Kenyatta) katika Mahakama ya Uhalifu ya Kimataifa iliyoko The Hague, Uholanzi ili irejeshwe nchini isikizwe na mahakama za Kenya.

Wamalwa aliacha kuwania urais dakika za mwisho mwisho. Hatua hii ilionekana na wachanganuzi wa kisiasa kama dalili ya ‘kumuachia’ Kenyatta kura zake ili akishinda amkumbuke katika Serikali yake. Hii ni kwa sababu Wamalwa angejiaibisha kama angewania urais. Hangekusanya kura zozote kwa kuwa hana ufuasi mwingi kwa hivyo ilikuwa jambo zuri kwamba aliamua kutowania urais.

Mwingine ambaye ameafikia mkataba wa kuingia katika Serikali ya Kenyatta ni Gideon Moi mwanaye, Rais mstaafu Daniel arap Moi. Chama cha Kanu ambayo kinaongozwa na Gideon hivi majuzi kiliwekeana mkataba na Kenyatta ili kuipa nguvu Serikali yake na kuongeza idadi ya wabunge na maseneta.

Jeremiah Kioni ambaye alikuwa mgombea mwenza wa Musalia Mudavadi pia alikutana na Kenyatta na kukubali kumuunga mkono. Pilkapilka hizi zote za Kenyatta si za bure na haziko kwenye ombwe tupu.

Kenyatta anafahamu barabara kwamba meli yake ya uongozi huenda ikakumbwa na misukosuko na dhoruba kali ambazo zaweza kumtupa kwenye fuo za utawala ama hata kuizamisha.

Hii inatokana na kesi ya uhalifu wa kibinadamu inayomkabili The Hague. Kesi hii ni donda sugu kwa kiongozi huyu na imeendelea kumwandama kwa miaka mitatu sasa.

Kenyatta anahofia kuwa, wabunge wanaweza kutumia Katiba bungeni kumtimua kwa misingi ya kesi hiyo kubwa ambayo pia inamkabili Makamu wake, William Ruto. Kwa hivyo, hana budi kufanya lolote awezalo kujiokoa asije akatimuliwa uongozini na wabunge wa upinzani haswa wa Muungano wa Cord inayoongozwa na hasidi wake kisiasa, Raila Odinga.

CHANZO ;MWANANCHI