CCM WAJIBU MAPIGO YA CHADEMA

Bendera ya Chama Cha Mapinduzi 

WIKI moja baada ya Chadema kufanya mkutano wa hadhara katika Viwanja vya Temeke Mwisho jijini Dar es Salaam na kuwashukia Spika wa Bunge, Anne Makinda na Naibu wake, Job Ndugai, CCM jana ilifanya mkutano katika viwanja hivyo, huku ikijibu hoja zilizotolewa na chama hicho kikuu cha upinzani nchini.

Mkutano huo wa Chadema ulifanyika Jumapili iliyopita, ambapo viongozi wake walitoa tuhuma mbalimbali kueleza jinsi Spika Makinda na naibu wake walivyotupa hoja za Mbunge wa Ubungo, John Mnyika na James Mbatia ambaye ni Mbunge wa Kuteuliwa.

Akizungumza katika mkutano huo, Waziri wa Maji Profesa Jumanne Maghembe alisema hoja ya Mnyika kuhusu uhaba wa maji katika Jiji la Dar es Salaam, ilitupwa kwa kuwa alichokuwa akikizungumza mbunge huyo, kilikuwa kikifanyiwa kazi na Serikali.

“Mnyika anatakiwa kutosherehekea mimba wakati mwenye mtoto ni CCM, Serikali ya CCM ndiyo imeweka miradi iliyopo katika Jimbo la Ubungo na inaiendeleza,” alisema Maghembe.

Alifafanua kwamba Mtambo wa Maji wa Ruvu Chini utakamilika kujengwa mwishoni mwa mwezi huu na utazinduliwa na Rais Jakaya Kikwete.

“Serikali imejianda kuhakikisha kwamba Mkoa wa Dar es Salaam unakuwa na maji ya kutosha katika mpango wake wa muda mfupi na mrefu. Katika mpango wa muda mfupi mpaka kufikia Aprili 2014, maji yatakuwa ya kutosha katika jiji hili,” alisema Maghembe.

Alisema kuwa hivi sasa Serikali ipo katika mpango wa kutandaza mabomba ya maji kutoka Ruvu Juu kwenda Dar es Salaam kupitia Bagamoyo, ambapo utaenda sambamba na uchimbaji wa visima 84.

Katika mkutano huo Makamu Mwenyekiti wa Kamati ya Kilimo, Mifugo na Maji, Neema Himid alisema kuwa hoja iliyowasilishwa na Mnyika bungeni ilikuwa ni; ‘Copy and Paste’, (ya kamati hiyo).

Mkutano huo ulihudhuriwa na viongozi waandamizi wa CCM akiwemo Katibu wa Itikadi na Uenezi, Nape Nnauye, baadhi ya wabunge wa Mkoa wa Dar es Salaam.