ZITTO AKIMBILIA POLISI

WAKATI Chama Cha Demokrasia na Maendeleo (CHADEMA) kikimwandikia Mbunge wa Kigoma Kaskazini, Zitto Kabwe barua ya kumtaka ajieleze dhidi ya tuhuma zinazomkabili, yeye ameamua kukimbilia polisi akimshitaki mmoja wa viongozi wenzake; Tanzania Daima Jumatano limebaini.

Habari za kuaminika zimedai kuwa Zitto ambaye hivi karibuni alivuliwa cheo chake cha unaibu katibu mkuu wa CHADEMA, inadaiwa amefungua mashitaka polisi akimtuhumu Katibu wa CHADEMA Mkoa wa Dar es Salaam, Henry Kileo kwa madai ya kusambaza waraka katika mitandao ya kijamii.

Akithibitisha tukio hilo, wakili wa Kileo, Peter Kibatara, alisema kuwa mteja wake amemriwa kufika makao makuu ya Jeshi la Polisi leo Jumatano saa nane mchana na kuonana na mmoja wa maofisa wa juu wa jeshi hilo, aliyetajwa kwa jina moja tu la Mbutta, kufuatia mashitaka yaliyofunguliwa na Zitto dhidi yake.

Hata hivyo, Kibatara hakusema waraka huo unasema nini, na kwa nini hali hiyo inatokea kwa sasa katika kipindi ambacho Zitto anakabiliwa na tuhuma za usaliti ndani ya chama chake.

Akizungumza kwa njia ya simu na Tanzania Daima Jumatano, Kileo alikiri kuitwa polisi, ingawa alidai hajui ni waraka gani anaotuhumiwa kuusambaza unaomchafua Zitto.

“Kwa kweli sijui hata mimi ni waraka gani, ingawa hivi karibuni kulikuwa na waraka wa siri uliodaiwa kutoka CHADEMA, na ambao ulijaa tuhuma za usaliti. Lakini huo tuliishaukana siku nyingi. Labda kuna mwingine,” alisema Kileo.

Zitto kutwa nzima ya jana hakuweza kupatikana kwa njia ya simu kufafanua mashitaka aliyofungua polisi. Simu zake zote za kiganjani zilikuwa zimezimwa.

Jana, CHADEMA kupitia kwa mwanasheria wake mkuu, Tundu Lissu, ilijibu hoja zilizotolewa na Zitto pamoja na aliyekuwa Mjumbe wa Kamati Kuu, Dk. Kitila Mkumbo mbele ya waandishi wa habari na kudai kuwa viongozi hao wanakabiliwa na tuhuma 11 wanazotakiwa kuzijibu.

Akizungumza katika makao makuu ya chama hicho, Mkurugenzi wa Habari na Uenezi, John Mnyika, alisema Zitto na Kitila wameandikiwa barua za kujibu tuhuma hizo na kwamba watapewa wakati wowote kuanzia leo (jana).

Kuhusiana na kile kilichoelezwa na Zitto na Dk. Kitila, Wakili Lissu alisema kuwa mkutano uliofanywa na viongozi hao waliovuliwa madaraka mbele ya waandishi walishindwa kusema ukweli wa kile kilichowafanya wavuliwe nafasi zao.

Lissu alisema Zitto na Dk. Kitila hawakusimamishwa nyadhifa zao kwa masuala ya PAC, uchaguzi wa mwaka 2010, wala kutoshiriki kwenye operesheni za chama au sababu zingine, na walitaja hizo sababu ili kupotosha tuhuma zinazowakabili kwa jamii.

“Walichokifanya kina Zitto na Kitila ni “Diversion” (kubadili mwelekeo) wa mashitaka yao yanayotokana na waraka wa kihaini wa mabadiliko, ambao ni kinyume na katiba, kanuni na maadili na itifaki ya chama.  anawaambia waandishi,” alisema Lissu.

Aliongeza kuwa CHADEMA kina mwongozo wa uchaguzi uliopitishwa na Kamati Kuu, Zitto na Kitila wanaufahamu ingawa haijulikani ni kwanini wao walienda kinyume na mambo yanayojadiliwa katika Kamati Kuu.

Aidha, Lissu alieleza kuwa Dk. Kitila anapotosha umma kwa kauli yake kuwa Kamati Kuu haina mamlaka ya kumvua nafasi yake ya ujumbe wa Kamati Kuu maana amechaguliwa na Baraza Kuu.

Aliwataka waangalie vema katiba ya chama, hasa majukumu ya Kamati Kuu, pale yanaporuhusu mwanachama yeyote kusimamishwa au kufutiwa uanachama kama Kamati Kuu itaona kuna umuhimu wa kufanya vile.

Alisema Zitto alipaswa kumkumbusha Dk. Kitila kuhusu suala hilo maana mbunge huyo alikuwepo kwenye Kamati Kuu iliyomvua ukatibu mkuu Dk. Walid Kabour, na makamu mwenyekiti bara, Chacha Wangwe.

Akaongeza kuwa kama Kamati Kuu iliweza kwa Kabour na Wangwe, imeweza na kwake pia ambaye kwa cheo ni mdogo kuliko Katibu Mkuu au Makamu Mwenyekiti.

CHADEMA yajipanga

Akizungumza katika mkutano huo, Mkurugenzi wa Oganaizesheni na Mafunzo, Benson Kigaila, alisema programu ya sasa ya ujenzi wa chama hicho toka makao makuu kwenda ngazi ya kanda iliyopitishwa Januari 28, mwaka huu iliunda kanda ili kugatua madaraka.

Mkakati huo ulianza na kuzindua kanda na uongozi wa kanda, kutoa mafunzo kwa timu za taifa, kanda, mikoa, majimbo, kata, vijiji/mitaa na vitongoji, hatua ya tatu kuunda msingi ya chama na mwisho itakuwa ni kufanya uchaguzi wa ndani ya chama.

Kwa mujibu wa Kigaila, kanda zote nane za bara zimekwishazinduliwa na zina uongozi kamili, na upande wa Zanzibar mkakati huo utazinduliwa Desemba.

Aidha kuhusu timu ya mafunzo, Kigaila alisema kuwa kitaifa kuna wakufunzi 10, kikanda wapo 40, kimajimbo 956, kwa ngazi ya kata 19,408, na kwenye vijiji na mitaa kuna wakufunzi 72,000.

Kigaila alisema sasa CHADEMA imetuma timu 13 zinazoondoka makao makuu kwenda katika kanda kushirikiana na timu nyingine ili kuunda timu 103 za majimboni kwa ajili ya kukagua utekelezaji wa zoezi hili, kutambua changamoto zilizopo na kusaidia na kupata suluhisho, pamoja na kazi ya kutoa mafunzo juu ya katiba ya chama, kanuni za chama na usimamizi wa uchaguzi kwa ngazi zote.