Vituo vinavyolelea watoto yatima wilayani Makete vimetakiwa kubuni na kuanzisha miradi endelevu

Vituo vinavyolelea watoto yatima wilayani Makete vimetakiwa kubuni na kuanzisha miradi endelevu itakayosaidia vituo hivyo kuzidi kutoa huduma bila kutegemea wahisani mbalimbali

Imeonekana kwamba kwa kufanya hivyo kutasaidia vituo hivyo kuendelea kuwepo hata kama wafadhili hao watasitisha ufadhili katika vituo hivyo, miradi waliyobuni na kuitekeleza itasaidia kuendesha vituo hivyo

Rai hiyo imetolewa na mkuu wa wilaya ya Makete Mh. Josephine Matiro wakati alipotembelea kituo cha watoto yatima cha Fema Matamba kwa lengo la kutoa msaada kwa watoto wanaolelewa kwenye kituo hicho

Alisema huu sio muda wa kubweteka na kuwategemea wafadhili pekee badala yake ni kuangalia mbele zaidi kwa kuanzisha miradi mbalimbali kama kilimo ambvyo itasaidia kuleta kipato cha vituo hivyo hasa ukizingatia hivi sasa wahisani wengi wanaanza kujitoa kufadhili masuala mbalimbali

Hata hivyo mkuu huyo amepongeza uongozi wa kituo hicho kwa kuwa na moyo wa kusaidia kulea watoto hao yatima ambao mara nyingi jamii imewasahau, na kusema kuwa malipo ya kazi yao yatatolewa na mwenyezi MUNGU

Awali akitoa maelezo kuhusu kituo kwa Mh. Mkuuwa wilaya, msimamizi wa kituo hicho cha Fema Matamba Bi.Ala Mbwilo alisema kituo hicho kinategemea msaada wa wafadhili waliopo nje ya nchi ambao hutoa sh. Milioni 2 kila mwaka fedha ambazo bado hazitoshi kuendesha kituo hicho

Pamoja na hayo alisema ukosefua wa maji nalo ni tatizo lililopo eneo la Matamba ambalo huwalazimu kwenda mtoni kuchota maji ama kwenye bomba za vijiji jirani kwa ajili ya mahitaji ya kituo hicho

Naye Askofu wa dayosisi ya kusini magharibi ambayo inamiliki kituo hicho Job Mbwilo ameshukuru kwa ujio huo wa mkuu wa wilaya huku alisema yeye ni kiongozi wa kwanza kufanya ziara ya kutembelea kituo hicho na kutoa msaada kwa watoto yatima wanaoishi hapo

Alisema wazo alilolitoa la kituo hicho kuwa na miradi endelevu watalifanyia kazi haraka iwezekanavyo kama namna ya kuboresha kituo hicho kwa kuwa jukumu la kuhakikisha watoto yatima popote duniani ni la jamii nzima, hivyo jamii nayo inapaswa kushirikiana kwa pomoja kuwalea watoto hao

Mh Matiro alitoa kilo 50 za sukali,unga wa ngano kilo 25,mafuta ya kupikia lita 10,unga wa sembe kilo 25,sabuni ya kufulia katoni 1,dawa za meno katoni 1 na soda kreti 1.