URUSI YASHUTUMIWA NA MAREKANI

Urusi leo imeishutumu Marekani kwa kuratibu usambazaji wa silaha kwa waasi wa Syria, licha ya hakikisho la wizara ya mambo ya kigeni ya Marekani kuwa haitoi msaada wowote wa silaha.

 Taarifa kutoka kwa wizara ya mambo ya kigeni ya Urusi imesema Marekani inafahamu kuhusu usambazaji wa silaha mbalimbali kwa makundi haramu yenye silaha nchini Syria.

Wakati huo huo, kiongozi mkuu wa kidini nchini Iran Ayatollah Ali Khamenei ameilaumu Marekani na Israel kwa uasi unaoendelea kwa mwezi wa 19 sasa nchini Syria. Khamenei pia amezionya nchi za Magharibi dhidi ya kuingilia mgogoro huo.

 Katika hotuba yake kwa Waislamu wanaoshiriki katika ibada ya Hijja mjini Makka, alisema vita vya wenyewe kwa wenyewe vinavyowahusisha vijana wa Kiislamu kuuwana, ni uhalifu ulioanzishwa na Marekani na utawala wa Israel, kuiadhibu Syria kwa kukataa uvamizi wa Israel na kuyaunga mkono makundi ya Kipalestina na Lebanon yanayopinga Israel.