TANZANIA 🇹🇿 HABARI

Jeshi la Nigeria limewaua wapiganaji wa Boko Haram

Ndege za kivita za Nigeria zimeshambulia kambi za wanamgambo wa Boko Haram kaskazini mashariki mwa nchi hiyo katika mapambano makubwa na kuzua onyo kali kutoka Marekani la kuheshimu haki za binadamu. 

Wanajeshi wametumia ndege na helikopta kushambulia ngome za Boko Haram katika operesheni kubwa ya kijeshi tangu kundi hilo lilipoanzisha  mapambano miaka minne iliyopita likitaka kuanzisha serikali ya misingi ya Kiislamu.Duru za jeshi zinaarifu kuwa karibu wapiganaji  30 wameuawa.

Siku tatu baada ya Rais Goodluck Jonathan kutangaza hali ya hatari nchini Nigeria katika maeneo ya kaskazini mashariki,waziri wa mambo ya nje wa Marekani John Kerry ametoa taarifa ya onyo kali inayosema kuwa nchi yake ina wasiwasi kuhusiana na madai kuwa maafisa wa usalama wanakiuka haki za binadamu ambapo  hali hiyo inaweza ikachochea zaidi ghasia na itikadi kali.