VIGOGO POLISI ,KILIMANJARO KATIKA KASHFA YA UPOLAJI WA ML/ 5

TUHUMA mpya zimeibuka kuhusu tukio la uporaji wa kutumia silaha wa sh bilioni 5.3 katika Benki ya NBC tawi la Kibo mjini hapa, uliotokea Mei 21 mwaka 2004, ambao unadai ulipangwa na kufanikishwa kwa kiwango kikubwa na vigogo wa Jeshi la Polisi mkoani Kilimanjaro ambao hivi sasa wamekuwa mabilionea.

Mmoja wa vigogo hao (jina tunalo) anadaiwa kuwa baada ya kusuka mipango yote na kukamilika alisafiri nje ya nchi kama njia mojawapo ya kupoteza ushahidi na mwingine akizima redio ya mawasiliano ya polisi (radio call) na kufika eneo la tukio kwa zaidi ya saa moja baada ya uporaji huo kutendeka.

Taarifa za siri kuhusina na tukio hilo la uporaji ambazo Tanzania Daima Jumatano limezipata hivi karibuni, zimebainisha kuwa askari waliokuwa lindoni na ambao walikamatwa na kufikishwa mahakamani, waliachiwa huru na mahakama ikiwa ni mpango uliosukwa na vigogo hao wa polisi ili kuepuka uwezekano wa kuwataja mabosi wao.

Mtoa taarifa ndani ya jeshi hilo ambaye alikuwapo wakati uporaji huo ukitokea, ameliambia gazeti hili kwamba vigogo hao kwa sasa ni mabilionea wakiwa na ukwasi usiomithilika ambako baadhi yao wamenunua maeneo makubwa ya ardhi na kujenga majengo makubwa ya ghorofa katika Jiji la Dar es Salaam.

“Wizi huo unadaiwa kupangwa kwa ustadi mkubwa kwani wezi hao waliingia ndani ya benki kwa kupitia mlango ambao hutumiwa na wateja wakubwa na kufanikiwa kupora kiasi hicho cha fedha bila kufyatua risasi ukiachilia mbali kuwaweka chini ya ulinzi wateja waliokuwa ndani ya benki,” kilieleza chanzo chetu.

Inaelezwa kwamba baada ya tukio hilo, majambazi hao waliondoka ndani ya benki hiyo bila kupata upinzani wowote kutoka kwa askari wa Kikosi cha Kutuliza Ghasia (FFU) waliokuwa lindoni siku hiyo ya tukio na kutokomea kusikojulikana.

Kwa mujibu wa habari, askari mmoja aliyekuwa lindoni katika benki hiyo, aliponea chupuchupu kupigwa risasi na wenzake baada ya kutaka kuingilia kati uporaji huo kutokana na kutokuwa mmoja wa walioshirikishwa katika mipango hiyo.

Kutokana na hali hiyo askari huyo aliishia kusalimu amri na kuwa miongoni mwa askari walionufaika na mgawo wa fedha zilizoporwa katika benki hiyo baada ya askari aliyekuwa akifahamu mipango yote kutokuwapo siku ya tukio.

Inadaiwa kuwa mmoja wa vigogo hao alihojiwa na Makao Makuu ya Polisi jijini Dar es Salaam, lakini suala hilo lilizimwa kama njia ya kuepusha aibu kwa kigogo huyo na inadaiwa kuwa amekuwa akienda kwa waganga wa kienyeji kila uchao katika moja ya wilaya za Mkoa wa Tanga.

Wakati huo Kamanda wa Polisi wa Mkoa wa Kilimanjaro alikuwa Mohamed Chico (sasa amestaaafu) lakini aliondolewa katika nafasi hiyo na na kurejeshwa makao makuu ya jeshi hilo Dar es Salaam baada ya kukaa katika nafasi hiyo kwa muda wa miaka 10.

Hata hivyo, haikuweza kufahamika mara moja ni nini kilichosababisha jeshi hilo kufanya uamuzi huo kwa Kamanda Chico kuondolewa wadhifa wake na kurejeshwa makao makuu ya jeshi hilo kwani hakuna taarifa za wazi zilizoelezea sababu za hatua hiyo.

Katika tukio hilo, mfanyabiashara maarufu jijini Arusha, Jackson Ole Nemeten ambaye kwa sasa ni miongoni mwa watuhumiwa waliopatikana na hatia ya kufungwa jela, alikamatwa na kiasi cha sh 47.8 huku Benjamin Julias mkazi wa Kijiji cha Nduguti Wilaya ya Iramba mkoani Singida akikamatwa na kiasi cha sh milioni 57.5.