KOMBANI : WANAJESHI ACHENI UBABE

WANAJESHI nchini wametakiwa kuacha kujichukulia sheria mikononi na kuwapiga raia zinapotokea vurugu kwani kwa kufanya hivyo ni kusababisha uvunjifu wa amani.

Kauli hiyo ilitolewa bungeni jana na Waziri wa Nchi Ofisi ya Rais, Menejimenti ya Utumishi wa Umma, Celina Kombani, alipokuwa akijibu swali kwa niaba ya Waziri wa Katiba na Sheria.

Katika swali lake, Mbunge wa Viti Maalumu, Esther Bulaya (CCM) alihoji serikali kuhusu malalamiko yanayotolewa mara kwa mara na wananchi yanayotokana na vitendo vya uvunjifu wa amani vinavyofanywa na wanajeshi katika maeneo mbalimbali nchini, ikiwa ni pamoja na kuwapiga wananchi.

“Pia yamekuwapo malalamiko kutoka kwa raia ambao wamekuwa wakivaa mavazi ya jeshi na kujifanya kuwa wao ni wanajeshi na kutumia mwanya huo kufanya vitendo vya uhalifu, hivyo kulichafua jeshi letu ambalo limekuwa likifanya kazi kubwa ya ulinzi na usalama wa nchi hii ya Tanzania,” alisema Bulaya.

Akiendelea kujibu swali hilo, Waziri Kombani alisema ni kweli kwamba kumekuwapo na malalamiko ya askari kuwapiga raia mara zinapotokea vurugu.

Akizungumzia baadhi ya watu kutumia mavazi ya jeshi kufanya uhalifu, alisema ni kweli watu wa aina hiyo wapo, lakini serikali imekuwa ikiendelea kufuatilia na kuwachukua hatua stahiki wale wanaobainika kutenda makosa hayo.

Katika swali jingine la nyongeza, Mbunge wa Mkanyageni, Injinia Habibu Mnyaa (CUF), ameihoji serikali kama iko tayari kufanya utaratibu wa kumlipa fidia mtu anayewekwa mahabusu bila hatia mara anapoachiwa huru na kugundulika kuwa hana hatia.

Akijibu swali hilo, Waziri Kombani alisema serikali haina utaratibu wala sheria yoyote ya kumlipa fidia mtu aliyewekwa ndani na kutolewa baada ya kugundulika kuwa hana hatia.

Awali katika swali la msingi, Mbunge wa Viti Maalumu, Fakharia Shomar Khamis (CCM), alihoji serikali ina utaratibu gani wa kumsaidia au kumlipa fidia muathirika ambaye alikuwa nyumbani kwake, kwa bahati mbaya akapata athari ya mali yake au kuumia inapotokea hali ya uunjifu wa amani.

Akijibu swali hilo, Kombani alisema kwa utaratibu wa sheria zilizopo, serikali haina utaratibu wa kumlipa fidia muathirika yeyote wa madhara ya uvunjifu wa amani pale inapothibitika kusababishwa na mtu au watu binafsi.