BARAZA LA KATIBA KIZUNGUMKUTI

VIONGOZI wa Kata ya Wazo, Dar es Salaam, wamedaiwa kuchakachua uchaguzi wa Baraza la Katiba kwa kuweka wajumbe bila kupigiwa kura.

Wakizungumza na Tanzania Daima jana, wajumbe waliochaguliwa ngazi ya mtaa ambao walitakiwa kufanyiwa uchaguzi ngazi ya kata, walisema siku ya uchaguzi walisubiri katika eneo la ofisi, lakini uchaguzi haukufanyika na badala yake mmoja wa wenyeviti wa mtaa alikwenda kwa wajumbe wanaosubiri uchaguzi na kuwaambia kuwa uchaguzi umefanyika na watu wameshapatikana.

Mmoja wa wajumbe hao, Gration Mbelwa, alisema taarifa ya mwenyekiti huyo iliwashitua na kuondoka katika eneo hilo huku wakijua viongozi wa kata wameafanya hujuma na kuteua watu wao.

Mbelwa alisema baada ya kuona zoezi hilo limepita katika mazingira tata, wameiomba Taasisi ya Kuzuia na Kupambana na Rushwa (Takukuru) kuchunguza tukio hilo na Manispaa ya Kinondoni kurudia uchaguzi.

Alisema viongozi wa Kata ya Wazo wamekiuka taratibu za uchagazi wa mabaraza uliotolewa na Tume ya Mabadiliko ya Katiba Mpya na kwamba hawana imani na viongozi hao.

Christina Komba alisema viongozi wa Kata ya Wazo si waaminifu, hivyo hawaoni umuhimu wao.

Mratibu wa Tume ya Mabadiliko ya Katiba, Ali Saadat, alisema watu ambao wamepitishwa bila kufuata sheria na kanuni zilizowekwa, tume haitawatambua.

“Kama kuna watu wamepitishwa bila ya kufanyika uchaguzi, tume haitapokea majina hayo, wanachotakiwa ni watu kupatikana kupitia uchaguzi,” alisema.