MWANAFUNZI AJINYONGA BAADA YA MATOKEO

MHITIMU wa kidato cha nne jijini Dar es Salaam, Barnaba Venant (18), amejinyonga baada ya kutoridhishwa na matokeo ya mtihani wake, yaliyotangazwa juzi.

Kamanda wa Polisi Mkoa wa Temeke, Englibert Kiyondo, alisema tukio hilo la kusikitisha lilitokea juzi, majira ya saa nne asubuhi katika eneo la Nzasa, Mbagala ambapo kijana huyo alijinyonga kwa kutumia kamba ya manila, aliyotundika kwenye dari ndani ya stoo ya nyumba yao.

Kiyondo alisema Venant alimaliza kidato cha nne mwaka jana katika Shule ya Sekondari Debrabant, Mbagala, huku akielezea kuwa sababu ya kujinyonga kwake ni kutoridhishwa na matokeo ya mtihani wake ambapo alipata daraja la nne la pointi 27, kinyume na matarajio yake.

Alisema mwili wa marehemu umehifadhiwa katika Hospitali ya Temeke wakati upelelezi wa tukio hilo unaendelea.

Matokeo kidato cha nne mwaka huu, yamekuwa gumzo kutokana na kiwango cha ufaulu kushuka kwa kasi ya kutisha.

Kwa mujibu wa matokeo hayo, jumla ya watahiniwa 240,903, sawa na asilimia 60 ya watahiniwa wote, wamepata ziro ambapo kati yao wasichana ni 120,239 na wavulana 120,664.

Wakati huohuo, watu wawili wamefariki dunia katika matukio tofauti, likiwemo la mkazi wa Kisensera Bunju B, Miraji Sewia (30) kukanyagwa na gari baada ya kulidandia na kudondoka.

Kamanda wa Polisi Mkoa wa Kinondoni, Charles Kenyela alisema kuwa ajali hiyo ilitokea juzi katika barabara ya Bunju eneo la Kisensera ambapo gari aina ya Fuso yenye namba za usajili T 614 AQX iliyokuwa ikiendeshwa na Freddy Ndenasi (45) ilimkanyaga Sewia na kufariki papohapo.

Katika hatua nyingine, Kamanda Kenyela alisema mkazi wa Mikocheni alijefahamika kwa jina moja la Mzee Selemani, amefariki dunia katika mazingira ya kutatanisha.

Alisema chanzo cha kifo hicho hakijafahamika na mwili wa marehemu umehifadhiwa katika Hospitali ya Mwananyamala kwa uchunguzi zaidi.