MOTO WATEKETEZA MAKAZI SIHA 42 WAKOSA MAKAZI

Watu 42 kwenye kaya 12 katika kitongoji cha Mji Mwema, kijiji cha Matandi, kata ya Ndumeti, wilayani Siha hawana mahali pa kuishi kufuatia nyumba zao kuteketea kwa moto majira ya usiku wakiwa wamelala.

 

Akizungumza na NIPASHE mjini hapa jana, Afisa Mtendaji wa kijiji hicho, Valence Silayo, alisema tukio hilo lilitokea majira ya saa 6 usiku na kuteketeza maduka 12 ambayo pia yalikuwa yanatumika kwa ajili ya makazi na biashara na kutokana na mbinu hafifu za kuzima moto walilazimika kubomoa vibanda vitatu kuvinusuru kuteketea.

 

Kamanda wa Polisi Mkoani Kilimanjaro, Robert Boaz, amethibitisha kutokea kwa tukio hilo na kueleza kuwa mtu mmoja amejeruhiwa na amelazwa Hospitali ya Mkoa wa Kilimanjaro ya Mawenzi.

 

Silayo alisema moto huo ulianzia kwenye makazi ya Rashidi Nelson, na kwamba vibanda hivyo vya mbao vilikuwa vinatumika kwa ajili ya biashara kwa upande wa mbele na makazi kwa upande wa nyuma.

 

“Hadi sasa watu hawa hawana makazi na wanahitaji msaada wa chakula na mahali pa kuishi kwa muda, moto ulizidi na kutufanya wazimaji kushindwa kuukabili ili kuokoa mali kutokana na upepo mkali uliokuwapo” alisema.

 

Silayo alisema vibanda hivyo wamekuwa wakivitumia kama sehemu ya biashara na makazi ya familia zao na kwamba kwa sasa wanahitaji msaada wa haraka wa chakula na mahema na wamejihifadhi kwa ndugu na marafiki.

 

Mkuu wa wilaya ya Siha, Dk. Charles Mlingwa, alisema serikali inafanya tathimini ya tukio hilo na polisi wapo eneo la tukio wakiendelea na uchunguzi ili kujua chanzo halisi na thamani ya mali iliyoteketea.

 

“Sina taarifa za watu 42 kutokuwa na makazi bali watu 12, najua kulikuwa na vibanda vya biashara na si nyumba za kuishi, wenye maduka walikuwa na makazi katika eneo jingine, hivyo hakuna watu wa kupatiwa msaada wa makazi” alisema Dk. Mlingwa ambaye ni Mwenyekiti wa Kamati ya Ulinzi na Usalama ya Wilaya hiyo.

 

Hata hivyo,  kumekuwapo na taarifa za kukanganya juu ya tukio hilo, huku uongozi wa kijiji ukisema tukio limetokea Matandu kata ya Ndumeti na taarifa ya polisi ikisema kijiji cha Ngaranairobi na Mkuu wa wilaya akisema ilikuwa ni vibanda vya biashara na si makazi.

 

CHANZO: NIPASHE