LOWASA AWAPA MASHART CCM

WAZIRI Mkuu aliyejiuzulu na mbunge wa Monduli, Edward Lowassa, amesema kuwa iwapo serikali zote mbili; ile ya Jamhuri ya Muungano wa Tanzania na ya Zanzibar, zitatekeleza kwa usahihi maelekezo ya mkutano mkuu wa Chama Cha Mapinduzi (CCM) juu ya suala la ajira, chama hicho kitashinda kiurahisi katika uchaguzi mkuu wa 2015.

Akizungumza katika mahojiano maalumu na gazeti hili jana kuhusu uchaguzi wa Kenya, Lowassa alisema amefurahishwa na jinsi Wakenya walivyolichukulia tatizo la ajira kama moja ya ajenda muhimu katika uchaguzi huo unaotarajiwa kufanyika wiki ijayo.

Alisisitiza kuwa, kama CCM nayo italichukua tatizo la ajira kwa vijana kama moja ya ajenda yake, kitashinda kwenye uchaguzi mkuu ujao kwa urais kabisa.

“Nimefurahi wenzetu Kenya wameliona tatizo la ajira kama moja ya ajenda muhimu katika uchaguzi wao. Nimefurahi Waziri Mkuu Odinga alieleza jinsi serikali yao ilivyojaribu kulishughulikia suala hili,” alisema Lowassa.

Alisema CCM imepiga hatua kubwa, kwanza kwa kukiri kwamba suala la ajira kwa vijana ni tatizo na kutoa maelekezo kwa serikali kulishughulikia.

“Moja ya maazimio ya mkutano mkuu wa CCM ni juu ya suala la ajira, na katika kikao cha Halmashauri Kuu hivi karibuni, tulilijadili kwa kina tatizo hili, na kwa kweli kama serikali zetu hizi zitatekeleza maelekezo yake, sina shaka yoyote CCM tutashinda kiurahisi 2015,” alisema.

Lowassa ambaye amekuwa msemaji mkuu wa suala la ajira kwa vijana akiliita kuwa “ni bomu linalosubiri kulipuka”, aliongeza kuwa uamuzi wa vikao hivyo ukitekelezwa vizuri utaifanya CCM iingie kwenye uchaguzi mkuu ikiwa na majibu sahihi yaliyokwishajibiwa juu ya tatizo la ajira kwa vijana.

“CCM imeanza kulishughulikia ili tusiulizwe na vijana 2015, tuangalie uchaguzi wa Kenya, hii ni moja ya ajenda muhimu katika kujinadi,” alisema.

Alisema kilimo ni moja ya eneo ambalo linaweza kwa kiasi kikubwa kutatua tatizo hilo pamoja na kwamba bado anaamini kuwa elimu ni muhimu kabla kilimo kwanza.

Aidha, alisema viwanda vikubwa vya nguo ni eneo jingine ambalo linaweza kwa kiasi kikubwa kusaidia upatikanaji wa ajira kwa vijana.

“Hii inawezekana kabisa, viwanda vya nguo ndiyo vyenye kutoa ajira kubwa, tusingoje mpaka vijana waje kutuuliza 2015,” alionya Lowassa ambaye anatajwa kuwa miongoni mwa watu wanaotaka kuwania urais katika uchaguzi mkuu ujao.

Kauli hiyo ya Lowassa imekuja siku moja tu baada ya Shirika la Utafiti la Synovate kutoa matokeo ya utafiti wake yanaoonesha kuwa chama tawala CCM kimeongezeka umaarufu ambapo asilimia 52 ya wananchi waliohojiwa wamesema wangependa kujiunga nacho.

Ama kwa upande wake, Lowassa kwa mujibu wa utafiti huo umaarufu wake kuelekea 2015 umepanda kwa asilimia sita na kufikia asilimia 7 akiwa miongoni mwa vigogo watano wa juu wanaopewa nafasi ya kushinda urais iwapo uchaguzi ungefanyika leo.

Lowassa kwa mujibu wa utafiti huo anatanguliwa na Waziri wa Ujenzi, John Magufuli mwenye asilimia nane, Zitto Kabwe wa CHADEMA na Waziri Mkuu Mizengo Pinda wenye asilimia tisa kila mmoja na Katibu Mkuu wa CHADEMA, Dk. Willibrod Slaa mwenye asilimia 17.