WATOTO WALIOUNGANA WAMLILIA WAZIRI MKUU

Maria na Consolata wakiwa na mbunge wa viti maalum ritta kabati. picha na denis mlowe

Na Denis Mlowe _- Iringa

Watoto wawili mapacha walioungana miili yao Consolata na Maria Mwakikuti wenye miaka 15 wamelilia Waziri Mkuu Mizengo Kayanza Pinda kutimiza ahadi yake aliyowapatia ya kuwapatia umeme katika kituo cha Nyota Asubuhi kilichoko katika katika kata ya Kidabaga Kijiji cha Ilamba Wilaya ya Kilolo Mkoani Iringa.

Walisema hayo baada ya kutembelewa na mbunge wa viti maalum Ritta Kabati mwishoni mwa wiki na kueleza kwamba tangu Waziri Mkuu atoe ahadi hajafika tena kijijini hapo na umeme umekuwa ni kikwazo kwao kwani umeme wanaotumia wa solar na jenereta haukidhi mahataji kwa kipindi hiki cha mvua hivyo kuna wakati wanakosa umeme.

Watoto hao wenye uwezo mkubwa darasani wakiwa kidato cha tatu katika shule ya sekondari ya Maria na Consolata inayomilikiwa na kituo hicho ni wacheshi kama wakishakuzoea lakini wenye aibu kama hawajakuzoea waliweza kueleza kuhusu maisha yao na kuonyesha ni kiasi gani wanaimani kubwa na uongozi wa kituo hicho wanapolelewa kwa kuweza kukiri kupewa huduma zote stahiki za binadamu.

Mbunge Kabati aliwapowauliza awaletee zawadi gani au msaada gani walisema wanapenda tu amfikishie ujumbe Waziri Mkuu ahadi yake ya umeme na alipowaambia atawaletea simu na komputa mpakato wakamjibu zote wanavyo shida yao kubwa ni umeme na aliwaahidi kwamba atawafata waweze kwenda mapumziko sehemu watakayopenda kwani wamekuwa watu wa chumbani, sebuleni na kanisani nalo liko katika kituo hicho.

Mapacha hao wakiongea kwa furaha na mbunge na waandishi wa habari waliowatembelea walionyesha kuwa na furaha kutembelewa na kuwataka wananchi wenye uwezo wawatembelee na kuwafariji na kusema wanashindwa kwenda nje ya hapo kwa kuwa watu watawashangaa kutokana na hali yao ya ulemavu.

Walipoulizwa kama huwa wanagombana Consalata ambaye anaongea sana kuliko Maria alisema walikuwa wanagombana wakati wa utoto ila kwa sasa kama wakiudhiana wananuniana na maisha yanaendelea licha ya kwamba hawachukui muda mrefu kuelewana na kuwa katika hali ya kawaida.