JINA LA DEO FILIKUNJOMBE LATUMIKA KUTAPELI

JINA la Mbunge wa Jimbo la Ludewa, Deo Filikunjombe limeendelea kutumiwa vibaya na matapeli wa Mkoa wa Njombe ambao tayari wamewaibia watu mamilioni ya shilingi, gazeti hili limebaini.

Imedaiwa kuwa matapeli hao wamekuwa wakitumia jina la mbunge huyo kwa kupigia watu simu na kuomba kutumiwa fedha kwa ajili ya jambo fulani au kukopa wakati siyo kweli.

Ludewa, Deo Filikunjombe

Uchunguzi  uliofanywa na gazeti hili umebaini kuwa tayari watu zaidi ya wanane ambao hawakutaka majina yao kuandikwa gazetini, walipigiwa simu na Filikunjombe feki kuombwa wamuazime kiasi fulani cha fedha au kuchangia miradi ya kijamii nao kufanya hivyo wakiamini kuwa ni mbunge wao.

Aidha, imegundulika kuwa mmoja wa matapeli hao amejisajili kwa jina la mbunge huyo na kuvuna fedha haramu.

Kiongozi mmoja wa Kituo cha Radio Njombe alinusurika kutapeliwa baada ya kumshitukia Filikunjombe feki, hivyo kukwepa kunasa katika mtego huo.

Kwa upande wake, Mbunge Filikunjombe amesema: “Sina kawaida ya kumtumia mtu au kuazima fedha kwa njia ya simu. Nawaomba wananchi wawe makini na matapeli wanaotumia jina langu kutapeli.”