POLISI WAKAMATA BANGI

 POLISI WAKIWA ENEO LA TUKIO

MKAZI mmoja wa Kijiji cha Kivuga Wilayani Kilindi, anashikiliwa na jeshi la Polisi kwa tuhuma za kumiliki shamba la bangina kuendesha biashara hiyo ya dawa za kulevya.Kamanda wa Polisi wa Mkoa wa Tanga, Costantine Massawe alisema jana

kuwa mtuhumiwa huyo alikamatwa juzi saa 10.30 katika kijiji cha Kivuga kata ya Kimbe Wilayani Kilindi baada ya kuvamiwa shambani kwake.

Alisema wakati akikamatwa, mtuhumiwa huyo alikutwa na bangi yenye uzani wa kilo 60 aliyokuwa ameiandaa kwa ajili ya kuisafirisha nje ya Wilaya ya Kilindi kwa ajili ya kwenda kuiuza.

Alisema jeshi la Polisi liliweza kumkamata mtu huyo baada ya wananchi wema kutoa  taarifa za siri zenye kudai kuwa amekuwa akijishughulisha na kilimo zao la bangi  kwa mda mrefu.

Katika taarifa hizo za siri zilizotolewa na wananchi wema ni kuwa mtuhumiwa huyo huuza katika mikoa jirani kwa watu ambao hujishughulisha na biashara hiyo haramu ya mihadharati.

Alisema mkulima huyo,awali alikuwa akijishuhurisha na uuzaji wa bangi na alipoona biashara hiyo inamuendea vizuri akaona alime shambani kwake ambapo amekutwa akimiliki shamba lenye ukubwa wa  robo ekari na kisha kuvuna na kuzisambaza katika mikoa ya Dar es Salaam, Morogoro na Dodoma.

“Jeshi la Polisi limeweka mkakati maalumu wa kuendesha kampeni ya kuyateketeza mashamba yote lakini wale wanaolima na kuuza bangi wajue wanafanya kazi iliyo kinyume cha sheria na kwamba tutahakikisha tunawakamata na kuwadhibiti," alisema Massawe.

Alisema mkulima huyo anatarajiwa kufikishwa mahakamani kujibu tuhuma za kulima na kuuza bangi ikiwa anafahamu kwamba ni kinyume cha sheria.