WAKAZI KIGAMBONI HAJA JUU

WAKAZI wa Kigamboni, wilayani Temeke, wamemtaka Rais Jakaya Kikwete kuacha kuwaamini watendaji wake kuwa suala lao la kupinga kuondoka katika eneo hilo kupisha ujenzi wa mji wa kibiashara limekwisha.

Wakizugumza kwa nyakati tofauti katika mkutano wa hadhara uliofanyika kwenye viwanja vya Ofisi ya Serikali ya Mtaa wa Kifurukwe, Kata ya Kibada, Dar es Salaam juzi, wakazi hao zaidi ya 300 walisema hawako tayari kuondoka eneo hilo kwa gharama yoyote ile.

Walisema suala hilo la kupisha ujenzi mpya wa Jiji la Kigamboni halijakwisha kutokana na Wizara ya Ardhi, Nyumba na Makazi kuliendesha kinyume cha sheria na propaganda.

Mwenyekiti wa mkutano huo, Issaya Mathayo, alisema wakazi hao hawana nia ya kumwaga damu bali wanaitaka serikali kuwa makini ili kuepuka kuufikisha mgogoro huo katika hatua hiyo.

“Mnajua suala la ardhi si la mchezo mchezo, kuitoa ni rahisi lakini kuipata tena gharama yake ni kubwa, hivyo tunaahidi hakuna atakayeondolewa kirahisi…kikubwa sheria zitumike,”alisema Mathayo.

Alisema sheria zikifuatwa hakuna atakayeondolewa kwa kuwa kila ardhi inapobadilishwa matumizi kwa ajili ya mandeleo, serikali hutumia sheria zake za mipango miji kwa kuwapanga wananchi katika eneo husika na si kuwaondoa.

“Kinachofanyika hapa ni ujanja hata hizo fomu ambazo tunaletewa tuzijaze zinaonekana si za kiserikali, kwani hazina hata nembo ya taifa hali inayotutia mashaka,” alisema.

Alisema hakuna mchakato wa kueleweka wa tathmini za mali zao uliofanyika kwa ajili ya fidia, hivyo wameamua kuiacha kamati iliyoundwa kwa ajili ya kusimamia masilahi yao kutokana na kuwa upande wa serikali.

Mwalami Mwinyimvua, alisema tangu kuanzishwa kwa mpango huo mwaka 2008 ieleweke kuwa hakujawa na makubaliano yoyote kati ya serikali na wananchi hao, kinachoendelea ni propaganda katika vyombo vya habari vya serikali.

Aliwalaumu madiwani wa Jimbo la Kigamboni kushindwa kuwatetea wakazi hao katika kujua hatima yao na badala yake wamejiingiza kwenye kazi ya udalali wa viwanja kwa masilahi binafsi.

Aliongeza kuwa hadi sasa wanaiheshimu kazi kubwa inayofanywa na Mbunge wao, Faustine Ndugulile, ya kupigania haki zao na kuahidi kuwa hawatamuacha kokote atakakokwenda.