ASKARI APIGWA RISASI NA MAJAMBAZI HUKO MBEYA HADI KUFA

WILAYA YA CHUNYA – ASKARI POLISI MMOJA AUAWA KATIKA MAPAMBANO YA

                                          KURUSHIANA RISASI NA MAJAMBAZI

ASKARI Polisi mwenye namba G.68 PC Jafari Karume Mohamed (30), amefariki dunia baada ya kurushiana risasi na watu wanaodhaniwa kuwa ni majambazi wilayani Chunya mkoani Mbeya.

Taarifa ya kaimu kamanda wa polisi mkoani Mbeya Barakael Masaki kwa waandishi wa habari iliyotumwa jana, ilisema kuwa kifo hicho kimetokea leo Februari 6, mwaka huu katika hospitali ya wilaya ya Chunya.

Alisema kuwa chanzo cha tukio hilo ni majambazi waane wakiwa na silaha idhaniwayo kuwa ya SMG walivamia kituo cha mafuta kilichopo kijiji cha Matundasi mali ya Samora Muyombe na kupora fedha Sh. 2,200,000.

''Majambazi hao walitumia gari T 227 BST aina ya Toyota Corola iliyokuwa ikiendeshwa na Shaban Msule (33) mkazi wa Makambako mkoani Njombe'' alisema Kamanda Masaki.

Aliongeza kuwa askari huyo aliyeuawa alikuwa doria na wenzake na walipofuatilia tukio hilo na katika mapambano ya kurushiana risasi alijeruhiwa kwa kupigwa risasi upande wa ubavu wa kulia na kukimbizwa hospitalini kwa ajili ya matibabu zaidi.

Katika mapambano hayo, jambazi Shaban Msule aliuawa kwa kupigwa risasi na gari lililotumika katika tukio hilo limekamatwa na maganda 9 ya risasi aina ya SMG/SAR na risasi 6 zimeokotwa eneo la tukio.

Kamanda Masaki ametoa wito kwa majambazi waliotoroka kujisalimisha wenyewe kabla hawajakamatwa na msako unaoendelea chini ya  RCO Mbeya Robert Mayala